Në procesin e anëtarësimit në BE, projektligjet që përafrojnë një akt të BE-së shoqërohen me një tabelë përputhshmërie. Tabela vendos krah për krah nenet e aktit të BE-së dhe dispozitat e projektligjit shqiptar, dhe tregon për secilin nen nëse përafrimi është i plotë, i pjesshëm apo mungon. Kështu boshllëqet duken menjëherë.
E njëjta metodë për kompaninë. Kur del një ligj i ri, si Ligji 124/2024 për të dhënat personale ose Ligji 25/2024 për sigurinë kibernetike, kompania përballet me të njëjtën pyetje: çfarë na kërkohet dhe çfarë kemi bërë tashmë? Një tabelë përputhshmërie për kompaninë ka zakonisht këto kolona:
detyrimi, nen për nen;
si e plotëson kompania sot (politika, procedura, kontrata, sisteme);
statusi: i plotësuar, pjesërisht, mungon;
rreziku nëse mungon;
veprimi korrigjues, përgjegjësi dhe afati.
Pse ia vlen:
Inspektimi: kur vjen rregullatori, keni një dokument që tregon çfarë keni bërë dhe ku.
Bordi dhe drejtuesit: shohin në një faqe ku qëndron kompania dhe ku duhen burime.
Investitorët dhe bankat: gjatë verifikimit ligjor para një blerjeje ose një kredie, tabela u kurson kohë të dyja palëve.
Grupet e BE-së: filialet shqiptare tregojnë se plotësojnë standardet e grupit.
Një tabelë e mirë nuk është dokument që mbyllet në sirtar. Përditësohet kur ndryshon ligji ose kompania, dhe bëhet mjeti kryesor për të drejtuar punën e compliance.