Projektet

Zyra Ligjore “Rakipi & Partners” ka marrë pjesë në projektin e Zyrës së Kombeve të Bashkuara për Drogën dhe Krimin, në hartimin e raportit shqyrtues dhe analizues të politikave penale që luftojnë veprimtaritë e paligjshme të tregtimit dhe trafikimit të armëve dhe municioneve luftarake, në shqyrtimin dhe analizimin e veprave penale me armë dhe eksploziv, si dhe në diktimin e nevojës për përafrimin e legjislacionit shqiptar me politikat dhe aktet përkatëse ndërkombëtare.

Zyra Ligjore “Rakipi & Partners”, në bashkëpunim me Zyrën Kazazi Consulting, ka marrë pjesë në projektin “Kërkime mbi tregtinë e paligjshme të duhanit në Shqipëri dhe vendet në kufi”, duke analizuar lidhjet midis politikave tatimore, legjislacionit penal kundër tregtisë së paligjshme dhe politikave shtetërore, në monitorimin e përpunimit dhe tregtisë së duhanit të papërpunuar, si dhe të tregtisë së paligjshme të duhanit dhe korrupsionit.

Me mbështetjen e Fondacionit Shoqëria e Hapur për Shqipërinë, Av. Romina Zano ka marrë pjesë në studimin dhe hartimin e projektit të titulluar “Tregu i sigurimeve: Mbrojtja e konsumatorit-viktimë në praktikën e funksionimit të Fondit të Kompensimeve”, i cili ka trajtuar problemet ligjore, rregullatore, mbikëqyrëse dhe praktike të fondit në tregun e sigurimeve në Shqipëri. Projekti ka shërbyer si oponencë e fortë në parandalimin e miratimit të projektligjeve që cënojnë të drejtat dhe liritë e palëve që humbin të drejta në Fondin e Kompensimit.